英語溫習 useful links

有用英語連結：

英語文法 English Grammar:

https://learnenglish.britishcouncil.org/en/english-grammar (英國文化協會總目錄 Grammar topics from British Council, 推薦！)


寫作練習題目 Essay writing topics:

https://www.ielts-exam.net/ielts_writing_samples_task_2/page/1/


寫作 Writing:

https://letterpile.com/writing/Words-to-Use-in-Starting-Sentences (連接詞 conjunctions and connectives)


動詞 Verbs:

https://learnenglish.britishcouncil.org/en/english-grammar/verbs (所有關於動詞的topics)

http://english.teamdev.com/phrasal_verbs (Phrasal verbs pictures)

https://m.youtube.com/watch?v=XEfqj6J5cBQ (不規則動詞 Irregular verbs (e.g. Go Went Gone, Bite Bit Bitten...)


面試技巧 (job interview)：

https://m.youtube.com/watch?v=kayOhGRcNt4


被動句式 Passive voice:

https://m.youtube.com/watch?v=kayOhGRcNt4

https://m.youtube.com/watch?v=7glMZfnKVoA


轉述/報告句式 Reporting Speech:

https://m.youtube.com/watch?v=ew4YHmNigRs

https://m.youtube.com/watch?v=AUCeEa7QS-8


會話技巧 Speaking English:

https://m.youtube.com/watch?v=YIBN4J6Dv9M (the use of linking words, 如何聽起來更流暢）


生字 Vocabulary:

https://m.youtube.com/playlist?list=PLQKm5R-SeKdPdARrZboTokM5JZZH3pTnb (一系列生字 playlist)

https://m.youtube.com/playlist?list=PL6BDo90oiwpTlYAYSitjwWn29BEdCBi9j (一系列生字 playlist)


句子結構 Sentence Structures:

https://m.youtube.com/watch?v=x3epNegcz6g

https://m.youtube.com/watch?v=Vzkn-ptjobs

Master Cleanse 十天排毒之旅2017

回想對上一次做Master Cleanse 啱啱係一年之前，即係2016年嘅夏天。今次開始做嘅原因有啲特別，已經唔係因為肥咗或者身體狀況唔好所以想去排毒（雖然係肥咗😺），最大嘅原因係想同朋友一齊做，今次有兩個朋友差不多同一時間開始，然後佢哋有有話俾我聽，我喺度諗不如我都一齊開始啦，因為搵到人陪自己用呢個方法係非常難得架。其中一個朋友係我中學同學，多年來嘅好姊妹，另一個呢就係在Instagram 新相識嘅外國朋友，佢哋兩個都係好貪靚嘅女仔，而且都完全理解master Cleanse 究竟係做緊乜同埋有啲乜嘢目的。
喺呢度先講下我做Master Cleanse 嘅歷史，第一次開始嘅心路歷程可以睇返我2016果一篇。今次我想講下近呢幾年喺身體同埋思想上嘅轉變。的而且確，自從做過master cleanse 之後真係冇乜病痛（托賴🙏🏻）。 病痛我係指一向我有嘅敏感啦同埋一年都會有幾次嘅流感，依家真係可以話完全冇敏感，而且冇感冒，慢性嘅疲勞亦都減弱左好多。精神上集中力越來越好，思考速度快咗，做判斷效率高左，而且對自己所需要嘅同埋不需要嘅東西更加確定，變咗節省左好多精神時間。

2017 Master Cleanse 排毒日記
第一天（11-8-2017）：
六點半起咗身就去飲鹽水，飲完大約半個鐘就去咗廁所了。之後就開始飲lemonade (lemonade這個簡稱是指lemon+maple syrup+chilli+water)

Master Cleanse 徹底排毒2016

先來報告一下master cleanse嘅效果，累計已經有成兩年幾冇病過亦都冇食過西藥（中藥都冇食，supplements的話只係間唔中會飲維他命C，同埋飲蔘茶），直至今個月頭因為搬屋壓力太大所以病咗一次，病得好緊要，發燒喉嚨痛仲有聲沙，夜晚咳到訓唔到好辛苦，但係喺冇食藥嘅情況下十幾日就自己好返了。以往非常嚴重嘅鼻敏感同皮膚敏感都已經好返九成九，睡眠質素持續都非常好，瞓醒個人精神飽滿。上次戒咗咖啡後都有慢慢飲番嘅，但係分量就大大減少咗了，依家大約一個禮拜四杯啦，戒咗零食之後亦都食少左非常多零食，口味有所轉變，吃東西時都識得選擇比較健康的食物例如多咗好多蔬菜同埋新鮮食物，所以體重一直都keep住五磅上落，但係因為缺少運動脂肪比例係大咗，都係時候要減肥喇。返工嘅時候都精力充沛，唔會特別易攰，做嘢自信心加強咗，諗嘢清晰咗，更自我肯定，知道自己需要同唔需要啲乜，更有效運用資源。

做Master Cleanse 的心路歷程：

已經唔記得係邊個人向我介紹 Master Cleanse 呢個方法去排毒，我真係好想記得返，想好好咁樣多謝佢，同埋同佢交流一下。

當初做 Master Cleanse嘅時候，目的其實係想快速咁樣減肥，同埋醫好免疫系統嘅問題。嗰陣時對排毒嘅概念都未係好清楚，亦都唔識去分辨邊啲係毒素引起嘅問題。從小到大免疫系統都過於活躍，簡單啲來講即係過敏，鼻敏感，皮膚敏感，眼又敏感，腸胃氣管都敏感，而且係對任何物質天氣轉變都敏感，長期都發低燒，個人㷫烚烚就會好攰，間唔時就會敏感大爆發，喺我第一次Master Cleanse之前就係因為一次極之嚴重嘅敏感大爆發，全身嘅皮膚黏膜都非常痕癢發炎，嗰一次係食乜嘢食物都係敏感，結果我飲咗三日維他奶同葡萄適過活，開始想食番啲正常餐，媽咪就整咗白灼菜心同白飯，結果食完之後個嘴同口入面就出血，痛到我死，完全訓唔到，嗰陣時我覺得成件事好荒謬，連嘢都食唔到係咪即係會死呢？！唔通我日日只可以飲葡萄適過活嗎？去到咁嘅地步，普通嘅抗敏藥同埋類固醇藥膏已經幫唔到我，但係如果食啲勁嘅或者打針，就會瞓覺瞓到完全做唔到嘢而且又更加勁嘅副作用。所以我諗起 Master Cleanse呢個方法，決心試一試，跟住我就上網搵咗好多有關嘅資料，同埋書，video等等，買齊材料就正式開始左人生第一次。

完成咗Master Cleanse之後嘅結果，當然就係人人都見到嘅減肥成功啦，而且體質方面亦都正常返好多，起碼冇成日發燒，冇咗朝頭早起身係咁sneeze，皮膚敏感嘅範圍同程度都細咗，精神同體力都好咗好多。不過呢啲都只係肉體上嘅改善，我覺得對我最大影響嘅係對我精神同思想上嘅效果，完成咗整個過程令我獲得好大嘅滿足感，而且

今次Master Cleanse嘅目標：

1）徹底為身心靈排毒

2）減磅減脂肪，改善皮膚頭髮健康

3）強化體質，尤其係保持免疫系統的平衡

4）戒除不良習慣，例如熬夜，飲咖啡，食零食

5）建立好習慣，例如早睡早起，定時運動

6）為自己嘅精神大掃除，令頭腦更清晰

7）訓練意志力及集中力

8）去除黑眼圈<-----這個點很重要

9）提高自律性

10）改變一下口味，以後多吃新鮮食物及減少調味品

開始日期：25-7-2016

材料如下 (此乃一杯250ml水杯份量)﹐一天約飲6-10杯﹐視乎個人﹐總熱量約為1000kcal﹐男人或者不希望減磅人士該飲多一點﹐但想減磅的﹐都係飲8杯好了。

• 2 Tablespoons Fresh Lemon Juice 約半個檸檬汁(細個)
• 2 Tablespoons Rich Maple Syrup  兩湯匙楓樹糖漿(如果無﹐用優質蜂蜜)
• 1/10 Teaspoon Cayenne Pepper Powder – or to taste (as much as you can stand) (少許辣椒粉)
• 8 ounces /250 milliliters of Pure Water  250ml凍滾水

卡卡用懶人方法整lemonade(一天份量）：

材料：

檸檬3個

楓樹糖漿150－200ml

指天椒半隻

1）首先預備一個碗。

2）將半隻指天椒用較剪剪碎放入碗中，加入少少滾水，用來滲出椒味。

3）榨3個檸檬汁入碗。

4）將碗中液體倒過隔篩進水樽。

5）最後倒150-200ml 楓樹糖漿入同一個水樽。

全日就係帶住呢支濃縮lemonade過活。大約每隔兩個鐘就倒少少出黎開暖水飲，太方便喇！

卡卡排毒日記：

第一天（25-7-2016）：今日放假，全日都係喺屋企。第一日通常都冇乜難度，由於屋企冇任何零食，屋企人嘅都知我係做緊master cleanse，所以都好配合冇叫我食嘢。完全唔覺肚餓只係覺得唔係咁口渴又唔想飲多水，不過都係有督促自己飲足咁多份量。做咗少少運動，練習下呼吸法，寫下blog咁，上下網平平安安就過咗第一日。我覺得寫blog幾幫到自己集中精神，同時提醒自己做緊乜。大約夜晚八點吃了Senokot，11點咁上下就訓左了，特登比起平時早啲。

第二天 （26-7-2016）：尋晚瞓得麻麻地，起咗兩次身。今朝早八點就起咗身，跟住就飲咗salt flush。隔左無幾耐就去廁所了，收成都唔錯。之後就再整Lemonade預備一整天的份量放喺個樽帶出街，啱啱用晒最後一支maple syrup添，一陣要出去入貨了！去到百佳買咗四支 maple syrup，都幾重下，買完就返工了。返工都冇乜特別，當然覺得時間過得慢咗啲，差唔多到食餐時間見到同事食曲奇，忍唔住食咗一塊😛。食餐時間都有約朋友同事食，佢食佢嘅飯盒，我飲我嘅糖水。今晚都係早少少瞓諗住休息好啲。

第三天 （27-7-2016）：尋晚比前晚更大鑊，無錯係好快瞓着，但係發左幾個鐘夢，仲要係發夢返工。唉，當然啦起身就無黎精神，朝頭早那那林拎主支野就出門口返工，是日返早。成朝都覺得有啲眼瞓，破戒飲咗杯熱茶覺得好好多，除此之外全日都係飲住糖水，體力方面同平時就差唔多啦，覺得嗅覺同視覺都敏銳左，出到街亦唔想聽歌，想靜靜地嘅感覺。對眼冇水腫明顯就大好多，黑眼圈就冇分別因為兩晚都瞓得差。條制服裙明顯地鬆咗，個面冇咁腫。不過今日冇去廁所因為返早唔方便。放咗工覺得不是太攰就出咗去葵芳廣場買嘢，買完野就返屋企休息寫blog。今日阿媽整好好味嘅蓮藕豬手，好香呀！不過我都中能夠把持得住，叫咗阿媽遲啲再整過。8pm食咗senokot，大約11點就瞓覺了zzZ

第四天（28-7-2016）：又發夢，不過今次好啲啦發好夢。發夢同我個BFF去旅行喺雪山吊車上，識咗同我地坐埋同一架嘅兩個遊客，仲諗住一齊繼續行程添🍻。起身之後精神好好，第一時間就去飲salt flush等去厠所，一邊就整定今日所需嘅lemonade。今日返P，超級忙，我就覺得精神體力應付有餘，我完全感覺到平時消化食物真係用咗好多精力。偶爾都覺得好口痕，好想食嘢，不過當飲完一杯糖水之後就忍得住。晏晝沖左杯薰衣草茶飲，herbal tea係禁食期間可以飲嘅嘢，當覺得好悶嘅時候，就飮吓薰衣草茶。今日覺得自己完全冇水腫，嗅覺靈敏咗好多，味覺都係，平時覺得平平無奇嘅薰衣草茶，今日飲覺得佢嘅味道有好多層次，香好多😌 頭腦都能夠維持住非常清晰。有一點很重要，每兩個鐘真係或多或少飲啲糖水，否則血糖跌就會有肚餓的感覺。今晚唔記得食senokot。

第五天（29-7-2016）：瞓得非常之非常好，覺得自己休息得好足夠，大約由十二點瞓到朝頭早七點半。起咗身之後就去飲鹽水，跟住就製作lemonade。明顯地覺得自己啲指甲同頭髮比平時長得快好多，因為我有留陰的，早三日先至剪過，今日已經需要再剪了。今日都係返P，都幾忙下，時間過得好快，一啲都冇諗過食唔食嘢嘅問題，睇嚟已經進入狀態，結果我全日都係飲糖水，同埋一杯薰衣草茶，完全冇破戒☺️ 放咗工就返屋企玩下狗仔，沖個涼用香薰油按摩吓，睇下youtube，做Mask寫blog。跟住好早就訓左了。

第六天（30-7-2016）：瞓得超好的，好到連㩒熄鬧鐘都唔知道😅結果就係瞓過龍啦，好在爸爸拍我門，我用左5分鐘就衝左出街，搭車返工。今日返早更忙到癲！忙到根本啲嘢係做唔切嘅，真係有啲攰嘅感覺，不過頭腦都係好精神能夠應付自如。大約每隔兩個鐘就飲一次糖水，好容易就過左一個上晝。下晝返屋企瞓一陣夜晚又返工了。平時返夜好鍾意食零食，食宵夜咁樣。但係幾日禁食我覺得自己個位口已經細咗，成晚都唔肚餓，反而要提自己飲下糖水，以免血糖低。

第七天 （31-7-2016）：返完夜朝頭早放工就返屋企，返到屋企上一陣網就敷mask同瞓覺。今日下午約咗人，我就帶埋支糖水出街，因為有少少眼瞓就忍唔住買咗支綠茶，飲下綠茶飲下花茶又飲下糖水咁樣就過左一日了。睇住人食嘢都不為心動，好似已經唔使用口食嘢咁😛 始終因為通宵做嘢，今日水腫係有嘅，但係比起平時就已經輕微左好多，而且精神體力都好足夠。返到屋企整左一陣洗面刷牙野就瞓咗覺啦，極速入睡😴

第八天（1-8-2016）： 尋晚瞓得非常非常之好，覺得係非常之深層嘅睡眠，所以朝頭早起身有種滿足同埋非常精神嘅感覺。

重點重溫：

1）每隔兩個鐘有糖水到肚係非常緊要，否則容易有肚餓嘅感覺，跟住就會好容易忍唔住去食嘢。

2）朝頭早最好都係飲啲鹽水（雖然有啲網站話呢個係選擇性咁樣飲），原因係我覺得飲咗鹽水之後對鹹嘅食物嘅craving細咗。

3）

懺悔式排毒減肥Master Cleanse 2015

最近幾個月由於好多慶祝活動，成日出街食好野，又食多左好多零食，例如薯片朱古力等等，開心嘅時候勁食，壓力大嘅時候就更加想食，簡直係一個無底嘅黑洞。近日返工覺得自己望落越嚟越肥，連着開嘅制服都唔啱着，仲要成日覺得腰酸背痛，個肚長期凸出非常核突，訓極都唔夠，面容浮腫，眼神渾濁，皮膚勁油，提唔起精神，全日都好想飲咖啡，時時刻刻都好想食嘢，我諗係到達臨界點喇，係時候要整頓一下飲食嘅規律兼強效排毒。咁啱有兩個好朋友都話要開始做Master Cleanse，我覺得機不可失，不如一齊排毒減肥！互相鼓勵一下！

是次10日輕咗7磅！

詳細master cleanse 方法請看http://winteregg-winteregg.blogspot.hk/2014/01/master-cleanse.html

卡卡用懶人方法整lemonade(一天份量）：

材料：

檸檬3個個

楓樹糖漿150－200ml

指天椒半隻

1）首先預備一個碗。

2）將半隻指天椒用較剪剪碎放入碗中，加入少少滾水，用來滲出椒味。

3）榨3個檸檬汁入碗。

4）將碗中液體倒過隔篩進水樽。

5）最後倒150-200ml 楓樹糖漿入同一個水樽。

全日就係帶住呢支濃縮lemonade過活。大約每隔兩個鐘就倒少少出黎開暖水飲，太方便喇！

卡卡今次Master Cleanse嘅目的:

減肥排毒

皮膚變靚啲

精神充沛啲

增強體力

提高自信

重整心態

頭腦清淅

提高自律能力

改善健康 （其實自從上兩次2011,2014年做完之後，身體已經好咗好多，皮膚敏感同鼻敏感好咗九成，只間中爆發，而且好快好返）

P.S. 全年都冇乜食過西藥

是次排毒減肥方法: 先Master cleanse + 後做運動(主要stretching)

卡卡的減肥Master Cleanse日記：

Day 1：

乘住澎湃嘅衝勁，今日一啲難度都冇，唔肚餓，唔囗痕！返工時竟然唔記得帶lemonade，好彩公司有存貨，工作時都精神奕奕，體力充沛。瞓得非常好！

Day 2：

一早起身返工，今日記得帶了，哈哈。早餐時間就飲完一杯小睡一陣，開工到中午時有少少攰，不過一飲lemonade，好快就恢復。全日都冇乜為食，反而係超想飲咖啡！放工返屋企沖涼瞓晏覺，大約8點食senokot，半夜4點肚痛，痾咗超多固體軟便便。聽日要晏啲先食通便藥，費事搞到要半夜起身。

Day 3：

今早起身皮膚明顯冇晒所有敏感，嗅覺靈敏咗。平時面頰會紅腫熱熱的，今日明顯平滑冇甩皮。口腔裏面鞋鞋的，脷苔超厚。今日放假留係屋企，上網做下年底去旅行嘅行程，執下屋，同自己做下一身體磨沙，面膜，修眉...咁樣就平安過咗一日啦。全日都係飲同一樣嘅真係好鬼悶嘅，所以我有時飲凍有時飲熱，有時又整淡啲，發揮一下創意整多啲花款出嚟。夜晚八點咁上下飲咗一杯排毒茶，點知到咗12點就已經肚痛，聽日都係夜啲先飲。夜晚瞓得非常好。

Day 4：

是日仲係放假，朝頭早八點鐘自然醒咗，一起身就飲咗一公升鹽水，過咗大約半個鐘就去廁所排毒。今日照鏡明顯個面冇晒水腫，可能因為已經幾日冇食重口味食物。全身嘅皮膚亦都好平整，冇晒粒粒或者任何紅塊或敏感。對食物已經冇咗嗰種心思思嘅感覺。脷苔依然非常之厚。下晝出咗市中心Habitu同朋友仔見面叫咗杯冰砂飲，瞓之前食咗兩粒Senokot。瞓得好好。

Day 5：

去到一半喇！今日起身好精神，第一件事飲salt flush。返工嘅時間係最易過的，所以全日都冇乜特別，一啲都唔餓，感覺到制服鬆咗，實在太感動喇！嗅覺變得非常靈敏，刷牙時感覺有少許沙從牙縫跌出，似乎係牙石。

Day 6：

今日返A/Night，晨早起身就隊咗杯鹽水，再飲咗啲lemonade為身體注入啲燃料先，跟住就返工。全日又係超精神，腰背冇咁累，脷苔開始冇咁厚同白。一路都係大約兩個鐘就飲一杯，能量水平都維持得幾好。放工返屋企瞓晏覺，夜晚又返工。制服真係明顯鬆了，肚依家完全平坦，腿部冇咁重。最期望見到瘦大腿和手臂，一定要堅持，因為最尾三日效果見得更快更厲害！

Day 7：

返咗成晚夜，比起平時正常飲食時竟然冇咁攰，夠精神。人輕咗行步路都快啲，第七日係最多人放棄的心理關口，我要加強警覺，一定要成功完成晒十日！今日見到個面型明顯尖左好多，小腿都明顯幼咗。開始完全冇諗咖啡了。因為今日係瞓覺日，比起返工無聊，的確係有少少口痕，不過都忍得住。

Day 8：

已經進入倒數階段喇，今日嘅戰意高昂！朝早起身仲有痾少少固體大便，我估計呢啲可能係宿便，因為都已經冇食任何固體嘢成七日。放假喺屋企計劃下行程，上網八卦下又過一日，對食物嘅心癮可以話係越來越细，整日都唔係好口痕。今日意外收鑊，刷牙時竟然有舊陳年血塊從舊年剝智慧牙的洞穴甩咗出黎！

Day 9：

順利踏入第九日啦，好興奮呀，好快我就可以飲湯！由於今日係要返工嘅，時間過得特別快，全日都精神奕奕，行路都輕鬆左。個個同事都話我瘦咗兩個圈，個面都細咗好多，超有滿足感呢！不過今日返工真係好多誘惑，有近日最hit嘅Garrett焦糖爆谷，有月餅，有蕃薯片，香蕉糕，酸蘿蔔，真係好想擺入口。

Day 10：

太興奮喇！到咗最後一日，任務完成，好有滿足感，今次輕了7磅，條脷變回正常粉紅色，排毒成功。

8分IELTS超速備試全攻略

本人考了兩次，第一次2月14號，overall 7.5，但因為speaking得6分，所以5月16號考了第二次，這一次overall 8分，所有卷都有7分以上。同大家分享小小心得：

報考之前，先搞清楚你要考academic module 定係General module，多數報postgraduate school或專業人士需要academic。
選擇考試日期最好之前可以day off的，之前一日温書練speaking run住個engine好緊要。
如果你目標係7分以上，勸你預留兩個月時間準備，時間太少浪費考試費用，但預備太長時間就會磨滅心志，建議最多預留三個月。
我嘅溫習方法主要係做Cambridge IELTS practice papers，睇YouTube ，聽Podcast，同屋企人練speaking，有時直頭自己同自己練，咁樣預備都算係低成本製作。我就唔係咁建議大家報course 因為好浪費時間，除非你本身grammar底真係好差。

以下就係每一份卷嘅貼士：

首先係Listening，分開四個部份，我覺得四個部份難度都係差唔多，最重要係段錄音播放之前你有足夠嘅時間睇晒啲題目先，如果唔係真係好難填。所以雖然佢係會喺每一part完結左之後俾啲時間你去check答案，但係你做嘅係應該要睇下一part嘅問題，否則我保證你做唔到落去。其實如果你平時睇開英文劇集或者電影都OK嘅話，Listening你唔應該覺得有難度，因為啲內容都比較容易，完全冇深嘅生字，最大嘅困難莫過於有啲speaker口音好重，例如英國澳洲愛爾蘭，有時可以係整段都聽得相當辛苦。完晒四個部份之後你會有十分鐘寫答案落答題紙，呢個時候你可以將啲答案寫得好整齊同埋注意有冇串錯字，大細楷啱唔啱呢，需唔需要眾數。平時我嘅預備方法都係聽podcast同埋操卷，大家真係冇需要去聽英文新聞報道嘅，因為考試嘅速度係慢好多，而且題材又非常之唔相似，建議大家不如睇多啲戲或者睇美劇，會更加有用而且又可輕鬆一下。

第二份卷就係reading，有傳聞話內容係由淺入深嘅，所以入面嗰三篇文，我係會順次序咁樣睇，而且頭一篇應該用最少時間，大概十至15分鐘好做完啦，因為你要預算後面嘅文會比較深啲用長啲嘅時間去做。做嘅策略係要睇左問題先，不過你要有心理準備，雖然話係skip黎睇，但係根據我嘅經驗差不多全篇文都睇晒先至識答所有題目，所以其實平時真係要睇多啲英文練習自己睇文更加快，如果唔係都考試嘅時候好容易就會唔夠時間做。呢份卷係冇時間俾你抄答案落答題紙嘅，所以一開始就要寫你嘅答案落答題紙。練習呢份件係非常之花時間同埋花精神嘅，如果你好肯定自己已經喺呢份卷可以攞夠分，就無謂再投資時間精神落去，應該去操第二啲卷，有效利用你考試之前寶貴嘅時間。我覺得睇英文報紙唔係太大幫助，而且非常沉悶，我覺得考試嘅文章比較此一啲好羅大眾媒體嘅科學雜誌，例如 Newton, National Geographic。總括而言考試用嘅文章真係會比較似學術果一類，例如講下語言學，人類學，自然科學，科技，工程，醫療，心理學，考古學，地理，歷史嗰一種。

第三份卷係writing，分兩部份，練習嘅時候一定要注意時間，當然到真正考試嘅時候更加一定要留意時間，好容易就會唔夠時間寫。第一部份係要用20分鐘寫一篇150字或以上嘅實用文，大約有以下幾種，但係無論邊一種都唔可以有自己意見，你要做嘅嘢只係將數據或者地圖或者流程表敘述出嚟：

Bar Chart

Pie Chart

Line Graph

Table

Flow Chart

Process Diagram

Map

記住喺第一篇文，最後一段你係唔可以用in conclusion。第一段最開頭嘅一句，你只需paraphase佢嘅問題，當然你一定要轉換啲字眼。

至於第二篇文，大致上可以分為以下幾種：

two-way discussion

problem and solution

two part question

One way discussion

任何形式嘅文章，都可以寫4段，頭一段introduction，中間兩個主段落，最尾一段conclusion。

作文呢份卷，絕對唔需要好多嘅論點，最緊要嘅係乜都唔可以錯，唔好用錯tense，唔好串錯字，唔好錯grammar。就算你啲論點同例子好廢好沉悶都絕對唔緊要，因為而家唔係考你個頭腦同知識，係評估你嘅語文能力。如果想更有效利用考試嘅時間，寫一篇出色嘅文章，一定要用大約五分鐘先寫好大綱，臨尾要預留幾分鐘去檢查一下有冇寫錯字，proofreading是必須的！如果唔做呢個步驟會好容易就失去左好多分。記住一篇好嘅文章首先就係唔好錯。

最後一份卷系下晝speaking，你要記住佢係有錄音嘅，所以你千祈唔好因為見到佢開個錄音機就會緊張。考試嘅時候時間過得非常快，千祈唔好dead air因為你要喺佢嘅限時之內盡量表現你係識講英文嘅。同樣地你千其唔好當佢係面試，絕對唔使諗啲好鬼聰明嘅答案，你嘅論點或者例子非常之癈都係唔緊要嘅，因為考官只係想聽流利同埋唔好離題嘅英文就得啦。如果掛住諗答案或者只係比誠實嘅答案你就會用咗好多嘅時間來思考，個策略係應該盡量好流利咁樣去講廢話，佢問完之後最好能夠即刻比答案。諗考試之前要留意一下時事新聞，有時考試嘅內容就係呢啲新鮮話題，同社會政治經濟有關嘅，如果唔睇下新聞都是就搭唔上咀了。

跟住我想講下考試嗰日會發生嘅事情：

考試嗰日你要帶自己報名時候用嘅嘅身分證或護照，同埋喺email印你嘅confirmation letter。按報到嘅時間到達試場，首先去一間大房擺低晒你嘅個人物品。你係唔可以帶文具同埋手錶嘅，佢哋會提供鉛筆擦子膠，同埋會有一個好大嘅投影電子鐘。跟住就係去影相同打手指模，然後等候進入試場。你可以帶一個透明嘅水樽裝水入去，不過我鄭重地勸你千祈唔好咁做，因為考試三個鐘係冇休息時間嘅，如果你要去洗手間就係用考試嘅時間去，非常浪費同阿危險！同樣地嗰日朝頭早就唔好飲咁多水喇。我考第一次嘅時候作作下文覺得非常急，又冇時間去洗手間，真係覺得有啲影響考試嘅表現。上晝一考就係三個鐘嘅三份卷，對於唔係職業學生嘅人士來講係非常之辛苦嘅，淨係要黐住張凳三個鐘已經唔係容易嘅事，仲要不停思考同寫嘢，集中精神，所以考試之前一晚有充足的睡眠係非常之緊要！而且考試之前要食一個有能量嘅早餐，唔好太飽，不過一定唔好血糖低。到中午會有時間俾你去食嘢，最少都有一個鐘，我第一次下晝系一點幾考speaking，第二次就係下晝四點。我發覺多啲時間休息同準備表現係會比較好㗎。不過呢樣野係冇得揀嘅，如果預備時間短啲就快啲食完野開始練習下，run 住副Engine。

差唔多啦，我預祝大家考試成功，一切順利！

有用連結：

熟習考試模式：https://m.youtube.com/playlist?list=PL2F706A85FD1A87CA

預備speaking正宗答法（一定要跟足）：https://m.youtube.com/playlist?list=PL5146091B6D89800B

溫習 grammar +生字+試卷題材及話題：

https://m.youtube.com/playlist?list=PL01269B14A762A15F

https://m.youtube.com/playlist?list=PLED8BF37E68E31EF3

考試技巧（有大量嘅貼士同Q&A,亦有收費合理嘅video courses,我買咗作文非常有用）：

http://ielts-simon.com

練習試卷：http://saifulislamsaaif.blogspot.hk/2014/01/cambridge-practice-tests-for-ielts-1-to.html

計分方法：http://www.examenglish.com/IELTS/IELTS_Band_Scores.html

speaking練習話題：http://iteslj.org/questions/

Podcast:

All Ears English

A.J. Hoge

雅思聽力

the English We Speak

ESL podcast 

                         

極速排毒減肥master cleanse 2014

睇番自己網誌，原來對上一次master cleanse已經係2011年嘅事。今日鼓起勇氣上磅一磅，竟然不知不覺重咗十磅，真係差D嚇死！其實就算唔磅，自己都知情況不妙架喇！由於停咗學跳舞，又懶去做gym（其實係因為做多咗家務同煮飯搞到冇時間），新居又冇連身鏡去警惕自己，所以對自己形象完全鬆懈，加上返工嘅地方唔使鑚研扮靚，而且對美食毫無節制，自助餐呀，放題啊，總之想食就去食。最近幾個月都覺得自己明顯面容浮腫，D衫又唔啱着，行又行得慢左，連身體都差晒，心情更大受影響。以前瘦嗰陣返工擔擔抬抬覺得輕而易舉，依家肥咗之後覺得返工有少少體力勞動就非常吃力！咁落去唔係辦法架，唔可以再懶喇，一定要開始返做運動，不過之前一定做一次master cleanse先，目的係先快速減磅排毒，然後做運動修身，希望夏天前能夠減返個十磅。

是次排毒減肥方法: 先Master cleanse + 後做運動(主要stretching)
開始磅數: 111 (6-2-2014)
目標磅數: 100（截至15-2-2014成功減至103磅，合共8磅）

材料如下 (此乃一杯250ml水杯份量)﹐一天約飲6-10杯﹐視乎個人﹐總熱量約為1000大卡﹐男人或者不希望減磅人士該飲多一點﹐但想減磅的﹐都係飲8杯好了。

• 2 Tablespoons Fresh Lemon Juice 約半個檸檬汁(細個)
• 2 Tablespoons Rich Maple Syrup  兩湯匙楓樹糖漿(如果無﹐用優質蜂蜜)
• 1/10 Teaspoon Cayenne Pepper Powder – or to taste (as much as you can stand) (少許辣椒粉)
• 8 ounces /250 milliliters of Pure Water  250ml凍滾水

（我就用懶人方法；總之一日用個3個檸檬汁，200ml 楓樹糖漿，半隻指天椒，一點五公升水，緊記全日只可以吃這些東西）

Master Cleanse的基本的傳統配方使用新鮮檸檬汁、辣椒粉和B級楓樹糖漿，可以追溯到60年代。Master Cleanse（也稱做Lemonade Diet）由 Stanley Burroughs 發明。照原作者說法, 一個療程為10天到40天. 沒錯, 10天都不能吃任何東西, 只能喝你的檸檬楓糖水. 餓了就喝. 渴了也喝. 頭3天是最難熬的日子, 但一旦撐過之後, 就很容易達成10天的目標。這是一個排毒清腸胃的配方，並不是減肥餐，但在這十天的過程裏，好大機會會令你減重。根據作者的描述:，過程中會排出一大堆又一大堆漆黑黏稠, 很像粗長橡膠管的排泄物.還能排出膽結石及硬化的膽固醇. 就開始覺得身體裏面變得好乾淨好輕盈. 另外除了排出身體廢物外, 它還能讓你減輕體重, 身體機能變年輕, 增強新陳代謝, 荷爾蒙分泌正常等. 不用吃藥, 不用動刀整型, 你就能立刻感受到你變年輕了。 

成份與功效
鮮檸檬汁
檸檬汁含高檸檬酸-- 一種產生能量(ATP)必需的弱性酸。它可以幫助加快新陳代謝，還有助於溶解腸壁積聚的垢塊。檸檬汁亦含鉀，有助於減少體內多餘的鈉。 
B級楓糖漿
使用B級楓糖漿原因是它的礦物A級豐富。B級楓糖漿含有有益的鋅和錳礦物。楓糖漿也是pH配方的甜味劑，它是少數未經處理“好“糖，提供微營養素給身體。 
辣椒
辣椒有助於增強流通，刺激並加速新陳代謝，從而更快地提供能源和減輕體重

名人與Master Cleanse
"(明報專訊)前政務司長陳方安生為了有靚樣見選民，早前便展開減肥工程。起初，Emily還以為陳太是因為要應付緊迫的選舉工程，才變得消瘦。昨日問陳太才知道真相，原來是她減肥成功。
一聽到減肥成功，Emily當然不放過機會，立即向陳太請教有何秘方。陳太亦很慷慨公開，她說，早前試了一個名叫「master cleanser」的澳洲療法，每天只飲開水加檸檬汁及蜂蜜，謝絕一切食物，當清腸胃，結果試了3天便瘦了8、9磅。陳太說，原本療程要持續10天，但因為無時間，最終要放棄。"

 On Oprah Winfrey’s show, the singer and actress Beyoncé Knowles announced that she had lost 20 pounds on the fast to prepare for her starring role in the new film “Dreamgirls.” 

Naomi Campbell tries to do the Master Cleanse three times a year..."the most I've ever done 
it for is 18 days"

Actress Demi Moore tweeted that she and her husband Ashton Kutcher were doing the Master Cleanse and, rather than weight loss or appearance, "this is about health!!!"

Actress and singer, Gwyneth Paltrow likes to do a fast or cleanse a couple of times a year. She's tried the Master Cleanse and found it worked well for her.

進行Master Cleanse 的前與後~
三天前(不包括禁食的10天）要慢慢减少食物的分量。第1天：不吃肉； 第2 天：只吃菜和水
果；第三天：只喝鮮果汁。
三天後（不包括禁食的10天），第1天：只喝鲜果汁； 第2 天：只喝湯；第三天：只吃菜和水果。(肉, 咖啡 ,牛奶是不可以攝取 )

Master Cleanse 的連結:http://themastercleanse.org/

注意事項: 

要戒咖啡，酒﹐茶，中西藥物（但應先自己衡量後果）

晚上要吃瀉藥（最好令自己每日排便，因為這個排毒方法就是要將腸道內所有污物排清）

早上起床後要飲一公升暖鹽水（幫助排毒）大約落一至兩茶匙海鹽

一年最多只可進行三次master cleanse

卡卡的成效總結：

鼻敏感完全消失

皮膚靚咗

個面尖咗

對眼冇咁腫

輕左好多磅

成功戒甩咖啡同茶

戒咗食藥，例如敏感丸

身體上有些皮膚敏感持續咗幾年宜家好番

集中力好咗，做嘢專心左

頭腦比之前更加清晰

呢短期間洗少咗錢

睇清楚乜嘢人真係幫你，邊啲淨係識潑你冷水

將本來食大咗嘅胃口變正常

戒甩左重口味

重建健康飲食習慣

好有成功感，心情靚返晒

卡卡鼓勵自己嘅金句：

1）用左成年時間暴飲暴食食肥咗，又懶咗成年唔做運動，只用十日食衰啲辛苦啲黎還債一啲都唔過分吖，我直頭覺得賺咗添！

2）食嘢嘅感覺真係好美妙，但點都唔夠見到自己健康咗靚咗咁開心。

3）唔好俾人潑你冷水，只有你自己先最清楚自己做緊咩嘢，況且話你嗰個其實可能lifestyle仲衰過你。

4）個囗冇咗味覺嘅刺激，慢慢覺得好多其他壞習慣都脫咗癮，例如飲咖啡飲茶，藥物等等，簡直係一石二鳥，又賺咗喇！

5）唔使食嘢每日多咗好多時間用，好多平時忽略咗嘅嘢再次得到我嘅關注，例如扮靚靚咁。我終於有時間可以做個全身磨砂lu！

6）堅定地拒絕引誘你食嘢嘅人，同埋嗰啲質疑你做法嘅人，堅定地捱過去，用成果證明俾佢睇你係得嘅，講到尾都係果十零日遮，放縱幾百日就得，立定決心十幾日都唔得，完全講唔通渦。
7）得閒都要參考吓人哋寫嗰啲blog，學吓人哋有啲乜嘢技巧同埋小竅門。

8）雖然呢個方法算係好平，但畢竟楓樹糖漿都要啲錢買又難搵，開始咗就唔好浪費金錢同心機，頂硬上啦！

9）完成到呢十日，證明個人有一定嘅意志力，呢個時候你對好多事情都更加有信心去勝任，亦都更有勇氣去接受挑戰，對自己嘅能力加深了解，百戰不殆。

10）十日禁食並唔係刻薄自己，而係關注自己健康愛惜自己身體，係好耐先進行一次嘅大掃除。

11）你要有心理準備，過程中難免要講比身邊嘅人聽，九成九人聽完都會好質疑你嘅做法，呢個時候你只需要諗住一樣野，比啲成績佢地睇，有句野叫做don't argue with success。

卡卡小秘技：

1）檸檬從中間切開，用生果刀插啲肉幾刀，切去尖的兩頭再用手揸汁會比較慳力。

2）唔用辣椒粉用新鮮辣椒，會比較好味，不過千其唔好加咁多，因住越浸越出味，搞到太辣飲唔到就唔好啦。

3）如果要拎出街飲，咁就最好開一支濃縮嘅，返到工就開水飲，咁就唔使拎咁重嘢了。

4）楓樹糖漿度度都差唔多價錢，唔好嘥時間格價喇，見到好買多啲，如果唔係飲完頭兩日買唔返就會好麻煩，始終唔係咁多地方有得賣。

5）其實日日飲檸檬水都真係幾悶，所以要搞D花款，有時可以整熱飲，有時整吓凍，有時濃啲有時淡啲都可以，咁對幫你堅持落去有幫助，不過記住水溫不可超過五十度，否則檸檬裏面嘅酵素就會被破壞哂，影響成效。

6）飲鹽水嘅時候唔好慢慢飲，最好一次過以最快速度飲晒一公升，因為佢唔好飲，而且一次過飲曬嘅效果比較好。

7）喺意志力開始動搖嘅時候，快啲自己睇吓自己寫嘅blog，提醒一下自己千祈唔好白費心機。

8）喺第三日後進行salt flush 時，覺得小小急就好去定廁所，否則後果不堪設想，因為第三日開始便便已經好流質。

9）如果真係好想食嘢例如朱古力咁，其實可以試吓用一小茶匙楓樹糖漿代替，慢慢食，我覺得都頂到下，而且又唔會破壞排毒大計，因為楓樹糖漿本身就係lemonade一部分。

10）一定要迫自己每日磅一次，因為如果你堅持到禁食，體重由第三日開始已經會下跌，呢個係一個好好嘅鼓勵，當你好脆弱嘅時候諗番自己減咗嘅磅數，就會打消破戒嘅念頭。

11）學我咁樣寫個blog，除咗記錄低每日嘅進度同成績，亦都可以同人分享同交流，最重要嘅係，下次你又要排毒嘅時候，可以睇番自己上次嘅經驗。

卡卡Master Cleanse排毒減肥日記：

Ease in 嗰三日唔寫喇，直逹主題吧啦

第一日:  (111磅）
一早起身已經食咗半塊擺係枱面吞拿魚薄餅，即係即刻破曬戒！跟住懷着沉重的心情去整salt flush，飲完嗰幾大杯鹽水後好快就作動，去廁所排毒，不過份量就唔多。之後就整檸檬楓糖水，仲要預埋返工份量，用水樽裝支濃縮的stock，咁就唔使拎咁重野。返到工，成枱都係賀年食品，朱古力，餅乾，仲有我最愛嘅鹹點，蘿蔔糕啊嗰啲。不過都係忍囗一舊都冇食。又唔覺得好肚餓，不過真係好想飲咖啡，或者茶。結果全日都只係飲檸檬楓糖水，同埋今朝發神經食咗個舊pizza，我覺得成績算係咁啦。聽日返早，今晚整定支stock聽日帶返工飲。第一日已經見到對眼皮明顯冇咁腫，可能因為食少左重口味例如鹽分多嘅食物。


第二日:（111磅）
尋晚瞓得好淋，直頭唔想起身，證明起碼冇因為肚餓瞓唔着。今日一起身已經無乜時間，攞住支檸檬楓糖水就衝咗出街返工，好彩尋晚整定遮！我都有陪同事食早餐，佢有佢食，我有我飲嘢。之後就進行salt flush，但係因為返緊工，只係飲咗一杯暖嘅鹽水，所以冇所出。九點鐘要去上training，仲係要體力勞動嗰隻，都仲夠energy應付。放咗工我就去咗銅鑼灣拎groupon，又行咗一陣街，全日都係飲住支野，完全冇破戒，返屋企搭車時仲記得食咗兩粒senokot（草餅）。返到屋企又煮飯又整麵包，連試味都冇試到，不得不又再讚自己真係好勁。其實今日都有開始運動，不過成績麻麻哋，啲筋完全拉唔開，跳兩下就上氣唔接下氣，呢個就係成年唔做運動嘅惡果喇。今日身體上的轉變最明顯嘅就係個面尖咗，皮膚敏感無咗，好口痕想揾嘢咬，脷苔先厚而後甩掉變成正常。

第三日:（110磅）
八點起咗身， 好好精神，先飲salt flush 排了毒（不多）再沖個涼洗個頭，上磅一磅竟然完全冇輕到，莫非加得太多楓樹糖漿？！好嬲呀！跟住就整我啲檸檬楓糖水。成朝覺得精神超好，頭腦好清晰，集中力好過平時，我覺得可能係啲味覺感官冇咁刺激，同埋腸胃毫無負擔，個身體多咗精力去進行其他活動。返到工忙到九彩，根本冇時間去廁所，莫講話諗食野，所以好成功咁樣全日只係飲檸檬楓糖水，一點兒雜念都冇。值得一提嘅係，我覺得自己嘅嗅覺靈敏左，唔係好識形容不過覺得好似每樣感覺都仔細左，我諗都係因為少咗好多官能刺激，平時已經麻木左嘅事情，一下子再變得有聲有色。放工返左屋企整定聽日的檸檬楓糖水，因為聽日又係返早。臨瞓前食咗兩粒senokot。

第四日：（109磅）

天未光又標咗出門口返工，好在趕得切拎鹽同檸檬楓糖水。到了早餐時間我就喺pantry飲saltwater flush 同l檸檬楓糖水，今日唔洗半粒鐘就去廁所，呢次啲就真係似樣，似積咗好耐的污物。有同事食朱古力，好香呀...不過一定要忍口。放工的時候凍咗好多，唔知係唔係呢個原因，我覺得好鬼肚餓，突然好掛住我D美食，例如朱古力啦，壽司，pizza，咖喱，煲仔飯，要繼續忍呀，絕對不能放棄。成個下晝一直都掛住想食野，夜晚再飲多兩杯檸檬楓糖水做宵夜，感覺又再好返啲。總括嚟講，我覺得今日係頭四日裏面最辛苦嘅一日，可能係因為早起身啦，又加上天氣突然轉凍，令我覺得個肚咕咕聲好肚餓。今日最大嘅轉變就係條褲明顯鬆咗，個肚腩細咗，面油都少咗。

第五日：（108磅）

都係返早，晨咁早起咗身，得番五分鐘就要出門口，我嗱嗱臨飲左幾啖檸檬水，再裝了小樽鹽就出門口。今日凍到飛起，出門口嘅時候只係得七度，仲要綿綿細雨加上大風，講真都幾金。返到公同事約我食早餐，我開頭嘅時候囗快快應承咗，後來諗諗吓無謂見到同事食早餐我又覺得肚餓搵自己笨，所以結果我都係留係病房自己飲嘢，點知同事好好，陪我一齊坐佢就食朱古力bar。由於成朝早太忙了，又要開會又多其他野做，所以時間過得特別快，一下子就到放工了，根本冇時間去掛住D食物，而且頭腦超級清晰，集中力超好，做嘢效率高過平時好多，竟然仲要對自己做嘅嘢信心大咗，感覺好神奇！食senokot然後返工了，因為今晚看夜。

第六日：（107磅）

第六日其實好早就開始咗喇，因為尋晚看夜。看夜時飢寒交迫又眼瞓，我有一刻好有衝動食粒朱古力安慰自己，好彩懸崖勒馬，迫自己諗今次排毒嘅目的，迫自己睇一下自己寫呢個blog，再諗下冇理由花咗五日心機咁快就輸畀一粒小小嘅朱古力，結果打消了念頭，乖乖坐低休息等放工。今朝早一番到屋企，就進行salt flush，今次效果好勁，疴足三次，質地比較黏，莫非就係千年污洉？痾完之後條腰即刻幼咗，褲都鬆埋！天氣真係好凍啊，得番六度，我成個下晝都匿係被竇玩iPad，覺得開始有少少肚餓就去整檸檬楓糖水。今日全日都唔係覺得好肚餓，只不過依然有少少心癮，掛住我啲美食。

第七日：（106磅）

今日天氣凍到不得了，8點起身嘅時候只係得番5.6度，嗱嗱臨煲滾啲水，飲salt flush，唔使半個鐘已經排咗毒，今次個啲顏色更加黑，質地更加黏，不過份量就唔多。跟住整檸檬楓糖水，整完就換衫出門口，去左超級市場買檸檬同其他少少食物，然後返工。其實今日全日都冇咩特別，總之完全冇破戒啦，個胃好似完全已經適應咗啦。放工嘅時候就更加凍，又落住雨，真有點飢寒交迫的感覺。所以一返到屋企就即刻煲熟啲水，整番杯檸檬水飲下，暖下個身先去瞓覺。

第八日：（105磅）

唔經唔覺黎到第八日啦，心情越來越興奮因為就快完成啦！今朝早嘅氣溫再創新低，仲要落埋大雨，好在今日放假唔駛返工，但由於太凍嘅關係我起咗身之後兩個鐘都仲痴喺張床。到咗八點半，唔得啦一定要起身排毒。今日排毒嘅份量變得更少，可能經巳痾曬啲污糟嘢出來喇。今日全日又凍又落雨，令人感到非常辛苦，手腳冰冷，真係好不利master cleanse，嚴重降低新陳代謝率，撞正咁嘅天氣真係有啲黑仔。但係如果咁樣都捱得過，第日何時何地任何情形都可以順利進行master cleanse。辛苦不在於肚餓，忍口絕對不成問題，而係在於又做唔到運動，因為着住啲衫勁厚，簡直不良於行莫講話做運動。而且咁凍嘅天氣令身體嘅細胞更加hold住的脂肪，變得好難減肥。再加上得嗰七度都不適宜係咁飲咁多水，費事飲完係咁去廁所。

第九日：（104磅）

話咁快就去到第九日啦！好興奮呀！因為就嚟可以見返我D美食啦，哈哈哈！今日依然係好凍，但係今日嘅士氣明顯地好過尋日好多，可能係因為排毒期快將完結。今朝唔駛飲鹽水都已經痾左三次，都係有啲黏黏地黑色嘅廢物排出，可想而知條腸係幾咁污糟糕呢。今日全日都只係飲檸檬楓糖水，同一大杯鹽水，食咗兩匙楓樹糖漿當零食。仲有一日渣，仲有一日我就完成左排毒期了！

第十日：（103磅）

七點我就起咗身喇，精神前所未有咁好！即刻煲水做salt flush，跟手整埋個檸檬水。大約半個鐘，已經有收穫了，今次嘅份量比尋日多少少，都係一啲黑黑地黏黏地嘅廢物，排完毒之後一身都係輕曬，非常之有滿足感，心情好愉快！跟住整檸檬楓糖水，再步行返工作地點。返到工一直都淨係飲檸檬楓糖水，然後再飲返啲滾水，因為天氣依然好凍。部分同事都覺得我明顯係比起之前瘦咗，問我用咩嘢方法，我當然好樂意分享呢個咁健康又經濟又容易嘅方法啦，希望佢地都可以受惠。放工啦終於，我懷住興奮嘅心情返屋企，聽日只可以飲菜湯，後日就可以飲菜湯加點生果，之後就可以食番正常嘢喇。

後記：

為時十日嘅禁食排毒期終於過去喇，雖然未減到理想磅數，但係明顯輕咗同埋少咗肥肉，嚟緊我諗住真係要食得比較清淡D健康啲，同埋一定要做運動配合，希望可以keep到。過多一個禮拜我會再update..

麵包樂園--煙肉芝士卷﹐芝士腸包﹐提子包

三日假期最後一日了﹐真係有D唔捨得啊﹐時間話0甘快就過。今日打算整D麵包for 阿媽阿爸做早餐同tea。一於煙肉芝士卷﹐芝士腸包同提子包啦﹗今次用牛奶白麵包底﹐加一隻半雞蛋﹐兩大湯匙olive oil﹐兩茶匙鹽﹐四包白糖﹐台灣高筋粉﹐少許改良劑﹐加長0左第一輪同第二輪0既發酵時間。結果出來好好食﹗超軟棉棉﹐帶少少鹹香﹐係傑作啊^O^ 唯一唔滿意的﹐係個腸仔包爆開0左﹐下次要痴實D先得~